المنطقة الحساسة

#‏منقوووول‬ تعلمي المكياج ولا داعي لاستغلال المزينات
واسفة على اي لفظ محرج وزي ماقلت الموضوع منقول
المنطقه الحساسه
مسائو ورد ع أحلا عضوات ف العالم وبرنسيسات المستقبل؛؛

اليوم ح نتكلم ع الاهتمام ب المنطقه الحساسه ب التفصيل العنايه اليوميه والاسبوعيه والشهريه البوست هذا مستنينه عضوات هلبا طلبوه مني بس نبي انقول انا آسفه جداً لو طلع مني لفظ محرج سواء للآمهات او للبنوتات الصغيرونات ولكن كلامي لغرض التعليم والافاده فقط؛؛
اول شي خلوني نعطيكم نبذه ع المنطقه الحساسه و وصفها عند دكاترة النساء والجلديه وصفوها المنطقه زي الرموش فوق العين ولذلك لحساسيتها وشديدة التآثر لان طبقة الكيراتين الي تحمي ف البشره قليله جداً ف المنطقه هادي فلهذا لازم نعتنو بيها بطرق صحيه وسليمه وبعيدا عن استعمال الصابون والمواد التجمليه لإحتوائها ع كمية كبيره من مركبات كيميائيه ضاره جداً ب الجلد؛؛

*طرق التنظيف اليومي للمنطقه الحساسه:-
خلينا نعرفو انه كل انواع الصابون والشامبوات واللوشن امتاع الجسم كله مضر ب المنطقه الحساسه حتي المطهرات خلوها قاعده عندكم ف الاهتمام ب المنطقه هادي انه لا افراط ف تنظيفها او الاهمال ف تنظيفها ف خير الامور آوسطها يعني الي يستخدمو ف ديتول وغيره يحسابوه ينظف ب العكس عزيزتي تهلكي ف روحك آكثر وتقتلي ف البكتيريا النافعه الي ف المنطقه لان البكتيريا النافعه ربي خلقها فينا لحماية هادي المنطقه يعني حكمه من سبحانه؛؛

*فلهذا طريقة التنظيف يومياً تكون هي غسل المنطقه من الامام الي الخلف لمنع نقل و انتشار البكتيريا وتغسلو ب صابون طبي يكون خالي من الريحه والكحول انا نستخدم ف جونسون ك غسل يومي وضروري التنشيف انكم تمسحو كويس المنطقه من الامام للخلف وتجففوها عن طريق المناديل امتاع الحمام بس اختارو نوع يكون سميك لان النوع الي يكون رقيق يلصق ويسبب سواد او خودو الفوط الصغيره مع استمرار تبديلها يومياً لان عدم تجفيف العانه بعد كل دخول للحمام حشاكم يساهم ف تكاثر البكتريا الضاره الي تسبب تحسس للمنطقه وطبعاً تزيد من اسوداد المنطقه فلهذا تكون المنطقه جافه قدر الامكان للمحافظه ع التوازن الكيميائي والميكروبي؛؛

*تغير الملابس الداخليه يوميا من مرتين الي ثلاثه مرات لو بذلتي مجهود وعرقتي وتكون ملابس الداخليه من القطن الصافي لان الملابس الداخليه من النايلو وغيره تسبب حساسيه وسواد ف المنطقه وديما اختارو الالوان الفاتحه البيضاء الورديه يعني تكون الالوان الزاهيه لان الالوان الغامقه والسوده تسبب تصبغ ف المنطقه ومابين الفخاد وابتعدو ع الملابس الداخليه الضيقه لان تسبب التحسس؛؛

*ف ناس عندها افرزات هلبا تاخد الفوط الصحيه اليوميه مش زي امتاع القطن العادي لا تلقوها ف الصيدليات امتاع الاستخدام اليومي مش تقعد ملابسك نظيفه وما يصيرلك اي تحسس او ميكروب هذا ف حالة عندك افرازات هلبا؛؛

*كيف انميزو بين الافرازات الطبيعيه الي تصير لكل النساء وبين الافرازات الي مش طبيعيه وضروري استشارة دكتور لان اكيد عندك مشكله ف المهبل هو الافرازات الطبيعيه ديما تكون لونها بيضاء او شفافه مع عدم الرائحه اما الافرازات الغير طبيعه وضروري تبي تشوفي دكتور هي يكون لونها مائل للإصفرار او للإخضرار وتكون فيها ريحه قويه ف الحاله هادي ماتلعبي بروحه ولا اديري اي وصفه وكلام فارغ تمشي للدكتور طول ويوصفلك علاج طبي لان المنطقه من اسمها حساسه يعني لا للمجازفات الزايده؛؛

*انجو للعنايه الاسبوعيه:-
العنايه الاسبوعيه هي انكم تستخدمو غسول مهبلي طبي ركزو ف كلمة طبي مش تجاري يعني ما تهتمو ب الغسولات التجاريه الي تكون ريحتها قويه هادي اضرك وماتنفعك ابداً ومن افضل الغسولات الطبيه الي مستحيل اضرك انا شخصياً نستعمل ف غسول طبي ماركة سيباميد يجنن وروعه وحتي غسول كيرفيري وغســول افووون وغسول سيتييل هادم من افضل الغسولات المهبليه الي غير مضره ولا تسبب اي تحسس؛؛

*طبعاً ب النسبه للغسول المهبلي حتي هو ماتكثرو منه مش كان طبي معناها ع طول تستعملوه لا حبيباتي للمتزوجه تستخدمه 3مرات ف الاسبوع ومايكون الايامات وراء بعض لا يوم بعد يوم ويكون الغسل داخل وخارج المهبل واضح القصد علاش ؛؛للبنوته العزباء مره واحده فقط ف الاسبوع ويكون استعماله غسل خارجي فقط يعني ماتقربي داخل المهبل واكيد فهمتو قصدي؛؛

*من ضمن العنايه الاسبوعيه هي ازالة الشعر من المنطقه اسلم واصح طريقه هي حلق العانه لاحلوه ولا شمعه تسبب امراض وترهل ف المنطقه وتقتل احساس الانوثه هذا كلام علمي يا بنات وحتي رسولنا الكريم موصي عليه افضل شي لازالة شعر العانه هي حلقها ب ماكينه وضروري تحولو الشعر الزائد من العانه لانها مكتومه وتركه يسبب تجمع البكتيريا الضاره تنتج التهابات مهبليه يعني حولو الشعر مره ف الاسبوع او حسب الحاجه لان ف ناس شعرها خفيف وطبعاً الكلام هذا موجه للمتزوجات والبنوتات مافيش فرق؛؛

*به بتقولولي الحلق يسبب سواد انا بنجاوب عليكم بنقولك لان تستخدمي ف الحلاقه بطريقه خطأ اول شي الموس او الماكينه ليها دور كبير افضل انواع الموس هي ماركة جليت فينوس متوفره ف كل الصيدليات تاني شي ما تستخدموش ف رغوه امتاع الحلق افضل نوع ماركة جليت؛؛به ف حالة عدم توفر رغوة جليت تاخدو بيبي اويل الي هو زيت جونسون للاطفال تحطيه لمدة 10دقايق ع المنطقه الحساسه وحلقي الشعر الزايد عادي طبعاً الحلق من الامام للخلف بمعني انا آسفه ف للفظ حتي المؤخره ماتهملوها وتحولو الشعر الزايد الي مابين التنيات اسفه مره تانيه بس مش نوضح ب الزبط؛؛

*بعد الحلق اديرو قناع النشآ ومية الورد تدهنو المنطقه القناع هذا يصكر المسام ويشد ويبيض ممتاز؛؛

*بعد ماتكملو الدوش الترطيب امر مهم اما ب زيت جونسون او زيت الزيتون او جنين القمح تاخدو قطره واحده وتدهنو يرطب المنطقه ومايخليهاش خشنه ولا تتعرض للسواد ولا الشعر يطلع مشوك؛؛ ولو تبو لوشن خدوه يكون خالي من الكحول والعطر زي بيبانتين او بينتاتول طبي كويس وغير ضار؛؛

*انجو للاهتمام ب المنطقه الحساسه وقت الدوره الشهريه:-(العنايه الشهريه)
اول شي تاخدو قطن يكون نوعه كويس عندكم كيرفيري او اولويز الي عندهم حساسيه ويسببلهم حكه وقت الدوره ماياخدوش الي لونه بنفسجي خدو الي لونه وردي خاص ب البشره الحساسه؛؛

*انكم تغيرو القطن كل 3/4ساعات ماتخلوشي مده اطول يسبب التهابات وحساسيه وكل ماتخشو للحمام حشاكم تمسحو وتجففو كويس من الامام للخلف؛؛

اخر ايام الدوره حولي شعر الزايد وينصح بيها اخر ايام الدوره تخفف من نمو الشعر الجسم عموماً؛؛

*استعملي مسك الطهاره في الي يكون حجر وفي الي يكون سائل وفي نوعين ابيض واسود واضمن مكان تشروه من عبدالصمدالقريشي لان يغشو فيه هلبا؛؛

-طريقة استعماله لو كان صلب حجر تبشريه ودوبيه ف مية الورد وتغسلي بيه المنطقه للمتزوجه يكون غسل من داخل ومن الخارج المهبل اما البنوته يكون الاستعمال والغسل خارجياً فقط ماليكم اي علاقه ب داخل المهبل؛؛طبعاً المسك يعتبر مطهر طبيعي ومعطر وغير مضر موصي عليه حتي رسولنا الكريم بجد ممتاز عن نفسي نستعمل فيه؛؛

*اخر نقطه غسل الملابس الداخليه تكون بروحهم مفصوله ع الملابس عن نفسي نغسل فيهم بعد كل دوش ع ايديا بصابون طبي خالي من العطور زي صابون جنسون او الغار وتكون الميه سخونه لقتل كل البكتيريا ونظفهوها مصمصوها من الصابون كويس ماتخليش اثر صابوني عليها لان بعد ما تلبسيها يسببلك تحسس